Hi，又係我DD！
上集講到我靠 PhantaBear NFT 賺咗差唔多四十幾萬港紙，成個人飄到上咗太空。之後好快，我就開始唔滿足於現貨嗰種「慢車」，正式染指幣圈最刺激又最危險嘅領域——合約交易。
🧠 合約初體驗：穩賺唔輸？我以為我係天選交易員
由2022年1月尾開始，到8月左右呢大半年，我主力都係玩合約。嗰排，啲利潤我都會分批由交易所提返落嚟，慢慢入銀行戶口，見住啲數字越來越多，感覺真係好實在。
可能真係有啲運氣，或者當時個市仲未算差，我居然持續有得賺！雖然中間都有輸有贏，但因為我設好止損，每次都控制得住風險，所以成體倉位係穩步向上。
短短8個月，我就靠合約賺咗差唔多五十萬港紙！
連埋之前NFT賺到嗰舊，我戶口上面正式突破 人生第一個「一百萬」！ 🤑
嗰一刻，我真係以為自己係天選之人，甚至覺得自己有機會成為香港幣圈最靚仔嘅交易員！
🎓 畢業即炒幣，日日禁掣賺錢，好似人生贏家？
嗰陣我仲喺度讀大學，但已經冇乜心機上堂。成日「扮緊做功課」，實際就係一邊trade、一邊睇K線圖。到咗2022年中畢業，見搵工難、人工低，反觀我喺屋企禁幾個掣就可以賺幾百、幾千蚊，真係超吸引。
諗都冇諗，我就決定——畢業即全職炒幣！
每日對住電腦炒幣，好自由唔使應酬人，仲可以訓到自然醒，聽落完美。但其實日日盯盤、做T、玩合約，精神壓力真係大得誇張。
賺到五十萬之後，我開始覺得撞到樽頸：想賺更多，但又唔想再承受合約咁高壓。於是我決定轉玩返「穩陣啲」嘅現貨，試下搵啲有潛力嘅中長線標的。
💥 FTX爆煲：幾日之內，我由百萬戶口變八萬
2022年11月，幣圈發生咗震撼全球嘅黑天鵝事件——FTX爆煲！
消息一出，市場即時陷入恐慌。我親眼見住FTT由$22一路崩跌：
$15、$10、$5……最後跌到**$2都冇**！
我個心同FTT一齊自由落體，個人由頭涼到腳趾尾🥶
最絕望嘅係：
我啲FTT全部質押咗，根本拎唔出嚟！
FTX一開始就暫停提款，我完全動彈不得，真係眼白白睇住資產蒸發。
我嗰幾日，唔敢開app、唔敢出門，連食飯都冇胃口。日日F5 Twitter、新聞，希望有奇蹟出現，幻想SBF會出嚟澄清，講句「冤枉啊大人」…
但係，現實好殘酷。
終於等到可以解除質押，將FTT轉去其他交易所賣出，已經遲咗。
我清倉時，換返嚟嘅現金，只得 大約八萬港紙。
🎯 All in FTT：我以為搵到下一隻暴升幣…
就喺2022年9月左右，我留意到FTX交易所嘅平台幣 FTT。
嗰時FTX如日中天，SBF（Sam）係幣圈嘅神級人物，媒體封佢做「加密界的巴菲特」。FTT當時由高位七十幾蚊美金跌到二十幾蚊，我覺得好抵，「博反彈」值搏率好高！
我心諗：買入價$22美金，即使升返去$60-$70，我已經可以由100萬滾到300萬！
咁吸引嘅「機會」，我點會唔搏？
於是，我做咗個改變命運嘅決定：
將之前NFT加合約賺到嘅一百萬港紙，全部換成FTT現貨，以約22蚊美金嘅價位，分批All in！
為咗防止自己又走返去做合約／亂咁買賣，我仲做多一步：
將全部FTT質押喺FTX平台收息！
心諗：「等升值＋收利息＝雙贏，呢鋪穩啦！」👍
結果——呢個「完美計劃」，就係我惡夢嘅開始。
🪦 一夜歸零：我以為穩陣，原來我係最大嘅「韭菜」
由接近一百萬跌到剩返八萬，
由「人生贏家」變返「零存款嘅普通人」，只係幾日嘅事。
嗰種又無力、又悔疚、又自責、又想喊嘅感覺，我到依家都記得。
原來所謂嘅「穩陣收息」、「長線持有」，喺幣圈唔等於安全——一旦平台爆煲，你連止蝕機會都冇。
呢次FTX事件，將我打醒晒——我唔係天選之人，我只係一個好彩贏過幾鋪嘅韭菜。
🔜 下一章：療傷與重生
之後，我點樣走出低谷？
又點樣陰差陽錯咁入咗OTC行業，接觸到真真正正玩緊大錢嘅人？
記得追住我《幣圈變形記》第三章：<療傷．轉型．重生>！
#DD幣圈日記 #FTT爆煲 #FTX事件 #幣圈教訓 #資產歸零 #質押陷阱 #韭菜血淚史 #黑天鵝事件 #全職炒幣 #加密貨幣 #幣圈變形記 #從零開始 #幣圈黑歷史
